Wala umanong nag-aalaga kay Pangulong Ferdinand Marcos Jr. sa Malacañang kaya ito nagkasakit.

Ito ang naging pahayag ni Senadora Imee Marcos kaugnay sa kalagayan ng kanyang kapatid, na isinailalim sa medical observation noong Miyerkoles matapos umanong makaranas ng diverticulitis dahil sa matinding stress at edad.

Matapos ang obserbasyon, tiniyak naman ng Pangulo na maayos ang kanyang kalagayan nang makabalik siya sa Malacañang noong Huwebes.

Sumailalim din umano siya sa follow-up check-up noong Biyernes ng hapon sa St. Luke’s Medical Center bago agad na bumalik sa Palasyo.

“Wala kasing nag-aalaga sa kaniya. Sino ba diyan sa nakapaligid sa Palasyo, sa dinami-dami ninyo, ang talagang nagmamahal sa kapatid ko? ‘Yan lang ang tanong ko,” ani Imee.

“Ang health niya ang bibigay. Kaniya-kaniyang agenda kayo diyan, wala namang umaasikaso sa kaniya,” dagdag pa niya.

Pinayuhan din ni Imee ang Pangulo na unahin muna ang sariling kalusugan at lumayo sa mga taong, ayon sa kanya ay nagdudulot lamang ng gulo.

“Pangalagaan muna niya ang sarili niya. Magpalakas siya. Talikuran niya na ang lahat ng nakapaligid diyan sa Palasyo. Panggulo lang ‘yan, wala sa kanila ang talagang nagmamahal sa kaniya,” aniya.

Binanatan din ng senadora ang ilang indibidwal na umano’y “ feeling presidente”, bagaman hindi pinangalanan ang mga ito.

“Kung ano-ano naman ang ginagawa nitong mga feeling presidente. Naku,” aniya pa. (AC)